Bärtschi isch bsoffe

Das wei mer de no gseh, öb dä Putin würklech bis Portugau chunnt. Isch nume guet, wehrt me sech ändlech z Öiropa, das Russland isch afe naach gnue a d Nato härecho. Dä isch so schlimm wi dr Hitler isch dä. Oder sogar no schlimmer, i kenne emu niemmer im Land, wo ne ungerschtützt. Vom Hitler, da het me sech no chönne la tüsche, no lang. Aber sicher nid vom Putin. Da isch me di lengschti Zit Pafi.. zifischt gsi, we so eine a d Macht chunnt. Itz müesse di Junge haut wider a d Seck! Süsch hei mer scho i paar Jahr kener Freiheite me hie, öb mer itz zu dere Nato ghöre oder nid. Dasch doch somene Geisch..schtesgschtörte gliich!

E gwüss, da mues me ds Soziale scho chly zämeschtriiche. Das Gäut, wo me hett, chly angers büschele. A-aangers geits nid. Meh für d Armee, nid für di Arme, u zwar richtig meh. U haut chly weniger für äbe di Arme, die.. eh ds Soziale u so, für Kultur u settegi Sache. U mau aues zrügschiebe, wo illegau ichewott. Jawoll. Da chöi mer is vo de Dütsche e Schibe abschnide. Wesi sech nid chöi uswiise, mache mirs! Hehehe! Dasch nid inhuman, Chabis! nämlech so chöi di Ächte ichecho, die wos würklech nötig he- hei.

Jä wo mer rächt hei, hei mer rächt. Hcks. Dasch aues nume dr Aafang. Das gseht me z Amerika, wo das no eh... härefüehrt. I luege scho gar nümme Tagesch-schou u so, scho lang nümm. I verfouge nume no dr Live.. dä.. Liveticker da. Hck. De gseht me immer grad was louft. Was chas Objekti-tivers gä? Me cha vom Trump haute, was me wott, hck, aber längwilig wirds eim nid. Hihi! U eines Tages, u vilecht schon glii, sägesi, i vier oder füf Jahr, drückt de scho mau eine uf e Chnopf, öb Russ oder Chines, u zwar richtig. Hihi! De chaisch de am Liveticker zueluege, wi d Wäut ungergeit. Po... po... potzmänt hingere, weisch wie! Aber de würklech dr ulimativ Kick, hähähähä!

Hcks. -