Dr Tubu vom Tram

Bärtschi mulet

Da chame doch nid eifach nume zueluge, seit eine zu mir, wo da di ganzzit a sim Äifone umetrückt u sicher no dehei durend a irgendöppisem umetrückt u gset, was dä Putin für ne Souhung isch u di Mullahs u di Hamas u dä Tschi da oder winer heisst, da müesme doch öppis mache, seiter, da chame doch nid eifach nume zueleuge, u seit das zu miir u luegt i sis Äifon derzue.

Drbi luegi doch garnid zue, grad äbe nid, i ha nume mit der Achsle zuckt, wo ner da hett afe politisiere. U wener so witerschnuret, de losi o nümm. Ufrüschte! heter gseit, di Tütsche maches o, aui maches, heter gseit. Eja, de tue du ufrüschte, das machsch du scho rächt, ha-n-ii schliesslech gseit. U we de d Bombe füre Fride losgöh, cha-n-ii de uf em Läivtigger zueluege, wi du i d Luft flügsch derbi.

E ja, me chönnt sech ja mau überlege, was me so schnuret, oder. I wett de gseh was isch, wemer einisch aui nümme zueluege. Nid wöumer nümme chönnte wöu dr Putin aui Kabu het usgschrisse. Ne nei, us freie Stück. Fertig schnätz. I meine itz nid grad d Revolution, mir luege eifach nümm häre. Da chöisi tue wisi wei. Mir choufe o nüt me vone. U d Wärbig luegemer o grad nümm a. Fertig.

Eifach nume zueluege u sowiso nüt chönne mache isch doch e fertige Seich. U öbs Chrieg git oder nid, entscheide afe mau nid mir, me fragtis ja nid emau. Me chunntis nume geng wägem Klima blöd verbi. U schiebt aus uf üüs ab, derbi versouhundesi scho mit dere Chriegerei d Häufti vo auem uf dr ganze Wäut. Was weimer da no go abstimme öb es Brüggli grüen oder gäub söu agstriche wärde, das nützt ja grad garnütme. Fertig mit abstimme, null. U am Schluss simer ersch rächt no tschuld a auem. De müestesi de haut irgendwie nöi afe lüge.

Guet. I ha du nütme gseit. I ha sowiso bim Zytglogge müesse usschtige. Dä söu doch ds Gfüeu ha är heig öppis z meine. Dä Bananebieger. Dä geit sicher au Tag pünktlech zum Huus us go schaffe, ganz seriös, i mues dä bewundere. U zaut si Zins u zaut sini Chrankekasse. Dä isch sicher froh daser ire Demokratii läbt u während dr Häufti vo sim irdische Wachzuestang ire längwilige Firma ungerdüre mues. U nim garnüt ghört i däm schöne Land, überhoupt nüüt. Wener nid es Läbe lang nach irgendere trurige Pfiife tanzt nume nid nach sire. De ghört ihm de vilech am Schluss wärweis es chlises Eigetumswonigli, e ja. Wo de ersch no d Bank wider iischtriicht wener abkratzt isch, dä Tubu.

De chaner de zueluege, vo ganz witt obe. Isch doch wahr.