Bärtschi Bärtus Bärtu

Demokratie

I weiss scho, dass es nüt bessers git. Emu nüt so Grächts u Riichs u Fridlechs wie d Demokratie. Entweder hesch e Diktatur, de gitts nume paar riichi Familie u dr Räscht si Hungerlider oder si wärde ghängkt. Oder haut so Chünige u Apparatschiks mit ihrne Kamarillas u so, chunnt uf ds Gliiche use. Oder Generäu, no schlimmer. Hesch uf au Fäu e mega Korruption u weisch hüt nid, was morn chunnt. Einisch schwümmsch obenuf, wett aune dr Arsch läcksch, u am angere Tag bisch im Knascht. Sicherheite hesch da keni, si mache höchschtens no Chrieg u du chunnsch für so ne Bananerepublik no unger d Reder. Das gäbs bi üs nid.

Klar, Minderheite, da mues me scho luege. Aber i finge, ir Demokratie isch Mitmache ds Wichtigschte. Wöu s isch ja aus der Wiuwe vom Vouk, auso vo üs aune. So oder so, u de macht mes eso. Aber i meine nid nume mitmache, wöu mes äbe de so macht, wi mes macht, sondern o bi de demokratische Prozässe. Hie zeut nämlech jedi Stimm. Ja, lue nume: grad uf dii chunnts drufa. Wett zum Bispiu nid geisch go stimme, hiufsch nume de Fautsche. Auso de Rächte. I meine, so ne Stimmabstinänzler hätt sicher o Ja gseit oder jenachdäm Nei, oder. Grad wie äbe ds Vouk. Genau wie du. Jenachdäm. Er hätt uf au Fäu nid Ja gseit, we die, wo grad äxtra gö go stimme, wöu si immer gö go stimme, wöu si d Demokratie wei schädige, Ja gseit hätte. U nid Nei, we di Angere, wo immer grad äxtra gö, nei, gsehsch wie? U drum gwinne gäng di Fautsche, wöu die, wo nid gö go abstimme, nid gö go abstimme. Ieu.

Eigentlech heisst ja das Ganze uf Dütsch Vouksherrschaft. Auso dass ds ganze Vouk herrschi. Natürlech nid jede über sich säuber u süsch nüt, das wär ja d Anarchie. De chönnte mer zämepacke. De gäbs überhoupt ke Herrschaft me. Das wär i re Demokratie verbote. Auso jede über jede, so isch es richtig. Wöu ire Demokratie hett kene em Angere meh z befähle aus dä ihm. U de wächslet das äbe mit dene Mehr- u Minderheite. Mängisch gwinne ja tatsächlich o di Rächte, auso di Lingge. U drum chame o nid würklech säge, dass me meh aus nötig uf Minderheite müessi Rücksicht näh, wöu das äbe sowieso geng wächslet.

Jä nu. Mira chönnt me sogar dr Kapitalismus abschaffe, i hätt nüt dergäge u würd gärn am Morge chli lenger schlafe. U d AHV scho mit füfzgi ifüehre. Irgendwie müesste si das ja de mache, we mir aus Vouk das wei. Mindischtens chönnte mer e augemeini Chrankekasse beschliesse, statt geng über di höche Prämie z jammere. Aber nei, lieber jammere, aus mau öppis würklech wöue z ändere. Es gwinne äbe gliich meischtens di Fautsche, auso di Rächte. Vilech isch ja jedes Vouk uf dr Wäut e chli tumm. Aber ds Schwizer Vouk isch no zähmau tümmer.