Dr Stucki Fred vo Jensebeize

es trurigs Gschichtli vom Bärtschi

Dr Stucki Fred vo Jensebeize hett ufghört rouke. Me sött meine, das sig öppis guets, me wird gseh, dasch öppis Schlächts. Wo Stucki uf d Wäut isch cho, nämlech im gliiche Monet wi nig, isch natürlech d Wäut no angers gsi. Das mit em Naturschutz het ersch grad agfange, wo ner i d Sek isch cho. Tämpolimit hetts no kes ggä ussert z Bärn vorem Bundeshus. U groukt hett me eigentlech überau, duss u dinn, sogar im Bundeshus no säuber.

Aha, Jensebeize, wüsster, dasch nid wit wäg vo Bärn, isch aber hütt ke eigeti Gmeind me.

Mir heinis gloub vomene Schuttmätsch här kennt. U hei nis du speter ir Stadt wider gseh, Stucki u nig. Nid regumässig, aber mängisch, we me sech übere Wäg isch ggloffe, isch me zäme eis go zieh. Was söu i säge? Är hetts bim Staat chli zu öppisem bracht u isch dert no fasch es höchs Tier worde. Dänkmaupfleg u so Sache. Dasch o immer wichtig, hett er gseit, u das heig de nüt mit pützerle u bibääpele z tüe. Gschide wi no viu, woni kenne, aber guete Kontakt zu de zwe Söhn, daschscho, emu wo si no Buebe si gsi. Ds Läbe lang isch er bi de Numismatiker gsi.

M-ö, de ischer uf di Sächzgi zue cho u hetts e chli mitem Härz übercho, u si heinim dringend grate, mit em Rouke ufzhöre. Wener überhoupt aut wöu wärde, de heiger de mau es böses Auter. I weis no, winer vor sim Bier ghocket isch u gseit het, entweder machi Stucki öppis rächt, oder er löngs grad la si. Weniger rouke chönner nid, aber üfhöre, das göng. De mües er de im Winter o nümme ds Dräcks erfriere duss uf em Baukon. Hehehe.

Ja, u dasch itz mau würklech eine, wos machgattig hett gschafft. Vomene Päckli drissg Jahr lang uf null pro Tag u Schtung. Drü Wuche lang. U när hetts ne putzt, wortwörtlech us heiterem Himu. I-u.

Ja, wöu... desch nämlech so gsi: autag ischer es Päckli Sigerette go choufe am Kiosk. Schtur. Dä hett itz nie e Schtange kouft. U zwar immer am Morge früeh, wener isch go schaffe. U autag, woner isch go schaffe, hett er e chline Umwäg gmacht, isch abboge, aber nümme graad wider zrügg uf d Strass, sondern imene Boge no umene Block ume u isch de zum Dänkmauschutz düre Hingerigang iche cho. Undsowiter, das macht ja eigentlech nüt, söttme meine. S isch scho mänge bimne Amt düre Hingeringang iche u gross düre Houptigang wider use cho.

Aber bi Stucki isch äbe gsi: itz, woner nümm hett groukt, hetter o nümm drü Minute früecher zum Huus us müesse jede Morge, für no schnäu go Sigerette z choufe. U er hett o nümm dä Umwäg hingerem Block düre gmacht für zum Hingerigang iche. Nei, itz isch er drü Minute speter vo däheime furt u ganz normau uf dr Houptstrass gloffe, bis er äbe vore iche isch. U dert, uf em Fuessgängerstreife vor em Dänkmauschutz, hetts ne drü Wuche speter verwütscht. Er hett nid ufpasst, u dr Laschtwage, wo derhärcho isch, hett o nid ufpasst u Stucki isch drunger cho u sofort tot gsi. Mustot. Uf der Schteu.

Wener no groukt hätt, wär das nid passiert, dä Fau isch klar. Die söue mir no einisch verzeue, rouke tööti. Söues no am Himu obe aschribe söuesis! Es wird nid wahrer! Nidrouke cha dänk o tötlech sii! Da hani itz miner Bewiise. Äue de schoo.

Höret jaa nid uf mit Rouke!